تعلم ان تقدر ما تملك قبل أن يجعلك الزمن تقدر ما كنت تملك!

عرض النص التحفيزي

صباح الوفرة

المقارنة ، فمرة المقارنة تعتبر من اشد الخدع اللى بيقع فى الانسان ، انا بسميها فخ المقارنة ، على الرغم من انه يبدو فى الظاهر انها حاجة كويسه عشان اقدر احدد مكانى فين فابدأ اقارن نفسي بالناس
ومن هنا بتبدأ الخدعة ، انى بتخيل انه ينفع اكون زيهم ، او لازم اكون زيهم ، فاضغط على نفسي عشان اقدر اوصل بغض النظر الناس دى ظروفها ايه وعملت دا ازاى او بدأت من امتى ، كل اللى فى باللى انا عايز اوصل زيهم
نجحوا.. انا عايز انجح ، اشتغلوا... انا عايز اشتغل ، اتجوزوا..... انا عايز اتجوز ، معاهم فلوس.... عايز يكون معايا فلوس ، عندهم عربية.... عايز يكون عندى عربية ، معاهم عربية اكبر... عايز يكون عندى عربية اكبر ، مبسوطين.... عايز اكون مبسوط
ودايماً فى كلمة بتزن فى دماغك ،،، اشمعنى ،،،، اشمعنى هما كدا وانا لا ، وكانك مش راضى عن حالك ، ومش هيرضيك الا لما تكون زيهم ، ولما تكون زيهم ، مش هترضى وهتكون عايز تبقى زى ناس تانيين
عايش طول الوقت فى سبق ، ضاغط نفسك ووقتك وحياتك عشان عايز توصل زيهم ، بغض النظر اصلا دا مفيد ومناسب ليك ولا لأ ، بتنهج طول الوقت ونفسك مقطوع ، مش لاحق ترتاح ولا تاخد نفسك ولا بتوصل ، زى ما انت بتحاول توصل هما كمان بيوصلوا ابعد ، وتفضل تجرى عشان تحصلهم هما وغيرهم
وهتلاقى نفسك مش راضى عن نفسك ، ولا راضى عن حالك ، ولا راضى عن ربنا ، ايوه مش هتكون راضى عن ربنا ، هتلاقى نفسك بتقول اشمعنى ، ليه يارب انا كدا وهما كدا ، ليه مخلقتنيش زيهم
المقارنه بتسرق منك احساسك بالحياة ، بتسرق منك انك تعيش اللحظة وتستمتع بيها لانك مش شايفها انت مش عايزها انت عايز لحظة تانية غيرها، ولحظة ورا لحظة ساعة تعدى ويوم وشهر وسنه ، وعمرك بيجرى وانت بتجرى ، عمرك بيخلص وانت لسه موصلتش ، لسه ماتبسطتش ، لسه مارتحتش
وتضيع اللحظات ، ويضيع العمر ، وترجع تشوف صورك زمان وتندم وتتحسر على اللى فات ومعشتوش ، ودلوقتى بيفوت ومش بتعيشة

ركز على اللحظة الحالية ، عيشها واستمتع بيها ، هتمشى ومش هترجع تانى

وتعلم ان تقدر ما تملك قبل أن يجعلك الزمن تقدر ما كنت تملك!
صباح الوفرة